राजालाई जोगाउने चरो-मुसो हुंदैनन्
राजाको सक्रिय शासनमा जनताले पाएको सबै भन्दा ठूलो उपहार भनेकै हत्या, हिंसा, महंगी हो । राजा आफ्नो सुखसयलका निम्ति जनताको ढाडै सेक्ने गरी मूल्य वृद्धि गर्न पछि पर्दैनन । उनको सक्रिय शासन सुरु भएयता दैनिक जसो मूल्य वृद्धि भइरहेको छ । कृतिम अभाव सिर्ज्ना भएको छ । कालोबजारी भइनै रहेको छ । ब्यापारी राजाले सक्रिय शासन गर्दा यस्तै हुंदो रहेछ, राजालाइ सत्ताको मात्र नभइ धन कमाउने मोह जागेपछि होस् पनि के । तर, सधै राजाकै मात्र दिन रहने छैन । जनता जाग्दैछन्, उनले जति महंगी बढाउंछन्, उनी गद्धी त्यागेर भाग्ने दिन झन नजिकिने छ । जनउभार महंगी विरुद्ध उत्रिन थालिसकेको छ । राजाको सक्रिय शासन समाप्त पार्न आन्दोलन गरिरहेका सात राजनीतिक दल पनि जनताको प्रत्यक्ष सरोकारको महंगीका विरुद्ध सडकमा कुर्लिन थालेका छन । यसो हो भने सात दल जनताको प्यारो हुने दिन नजकिने छ । यसले जनता र राजनीतिक दलको घनिष्टता बढाउने छ र निरंकुश राजालाइ गतिलो धक्का दिन बल पुग्ने छ । लोड सेडिङ र मूल्य वृद्धि गर्ने सरकारी निर्णय ‘जनतामारा र राष्ट्रमारा’ भएको भन्दै सात दलले १३ चैतका दिन राजधानीलगायत देशभर विशाल प्रदर्शन गरे । राजाको सरकारले हालै पेट्रोलियम पदार्थ र उपभोग्य सामाग्रीमा मूल्य वृद्धि गरेको छ । दरबारमा खानेपानीको छेलोखेलो छ । तर, राजाको गाउं अर्थात राजधानीका जनता पिउने पानी समेत नपाएर हैरान भएका छन । सात दलले अन्य भागमा झै राजधानीमा पनि प्रदर्शन गरे । राजधानीको असनबाट सुरु भएको दलको प्रदर्शन नगरका विभिन्न भाग हुंदै इन्द्रचोकमा पुगेर सभामा परिणत भएको थियो । प्रदर्शनमा सहभागीहरुले लोडसेडिङ हटाउनु पर्ने, पेट्रोलियम पदार्थमा गरिएको मूल्य वृद्धि फिर्ता लिनु पर्ने र उपभोग्य वस्तुमा गरिएको मूल्य वृद्धि फिर्ता लिनुपर्ने नारा लगाएका थिए । यो आन्दोलनले स्पष्ट संकेत के गरेको छ भने राजनीतिक दलसंग जनता एकाकार हुंदैछन । यसले निरंकुश राजालाइ कुनै पनि दिन गद्धी त्याग्न बाध्य बनाउन सक्छ । जुनसुकै मुद्धा लिएर किन नहोस् जनता एकै पटक सडकमा आर्ेलिएको दिन राजालाइ जोगाउने कोही हुनेछैन-उनका सेना, प्रहरी र सत्ता पाउन्जेल वरपर बसिरहेका निरंकुशतावादी आफै जोगिन खोज्ने छन, तर, राजालाइ जोगाउने चरो मुसो हुने छैन ।
